У некалькіх кітайскіх гарадах з’явіліся гандлёвыя аўтаматы з жывымі хатнімі жывёламі, мясцовыя жыхары выказалі абурэнне ў сацсетках. Пра гэта паведамляе Oddity Central.
Відэа з катамі, шчанюкамі і грызунамі ў маленькіх замкнутых адсеках разляцелася па мясцовых сацсетках. На кадрах, знятых у Пекіне, напрыклад, ёсць каты, што спяць у празрыстых камерах, у якіх яны могуць толькі развярнуцца.
У апісанні да відэа гаварылася, што гэта першы такі аўтамат, але карыстальнікі ў каментарах адзначылі, што бачылі падобныя ў іншых кітайскіх гарадах.
І хоць жывёлы, паказаныя на гэтым вірусным відэа, не выглядалі змучанымі ці хворымі, у некалькіх каментарах у сацсетцы Weibo гаварылася пра тое, што ў такіх маленькіх кантэйнерах бачылі хворых і нават памерлых жывёл, бо ім не забяспечваюць належнага догляду.
Паводле інфармацыі выдання, гэта не першы прыклад жорсткага абыходжання з жывёламі ў Кітаі. Там раней прадавалі «жывыя бірулькі» з маленькімі рыбкамі і чарапахамі, штучна афарбаванымі жабамі і куранятамі.