Аляксандр Лукашэнка лічыць дэзінфармацыяй заявы пра ўкраінскае контрнаступленне. Пра гэта ён заявіў на сустрэчы з удзельнікамі паседжання Савета Парламенцкай асамблеі АДКБ, перадае яго прэс-служба. Адзначым, што прагнозы і аналітыка Лукашэнкі наконт вайны ва Украіне не вылучаюцца дакладнасцю.
«Перш чым абвінавачваць нас у канфрантацыі, пашырэнні гэтага канфлікту, трэба вярнуцца за стол перамоваў. Узяць не той дакумент (які выпрацоўваўся на пачатковым этапе падчас праведзеных некалькіх раўндаў расійска-ўкраінскіх перамоваў. — Заўв. рэд.) — новы. Каб спыніць вайну. Шмат цяпер кажуць: „Контрнаступ, контрнаступ!“» — сказаў Лукашэнка.
Ён лічыць, што размовы пра ўкраінскае контрнаступленне могуць быць дэзінфармацыяй.
«Але, мушу сказаць, самая вялікая дэзінфармацыя — гэты „контрнаступ“. Ніякага „контрнаступа“, з майго пункту гледжання, няма і быць не можа. Гэта проста вар’яцтва. Адзін да пяці на фронце ваяваць па тэхніцы і жывой сіле — гэта проста вар’яцтва! Не, трэба нагнятаць, трэба накручваць украінцаў для таго, каб працягваць і патапіць нас у гэтым супрацьстаянні. У гэтым сёння сутнасць на фронце. Мы гэта бачым. Гэта ў нас за плотам проста», — заявіў Лукашэнка.
Нагадаем, прагнозы Лукашэнкі наконт ходу вайны ва Украіне не вылучаюцца дакладнасцю.
Яшчэ 5 лютага 2022 года, прыкладна за тры тыдні да старту поўнамаштабнага ўварвання Расіі ва Украіну (у тым ліку з тэрыторыі Беларусі), ён заявіў, што магчымая вайна Украіны супраць Расіі і яе саюзнікаў па АДКБ «будзе доўжыцца максімум тры-чатыры дні».
У сакавіку 2022 года, ужо пасля пачатку вайны, Лукашэнка ў інтэрв'ю японскаму тэлеканалу TBS зрабіў яшчэ адзін прагноз што да тэрмінаў заканчэння вайны — не такі канкрэтны, але не менш катэгарычны: «Я перакананы, што найбліжэйшым часам гэты канфлікт, аперацыя Расіі, скончыцца мірам».
А 1 верасня мінулага года Лукашэнка падзяліўся новымі дакладнымі інсайдамі пра набліжэнне заканчэння вайны: «Найбліжэйшым часам развязка будзе».
Вайна ва Украіне ідзе ўжо 449-ы дзень.
