Размаўляючы з журналістамі на борце прэзідэнцкага самалёта па вяртанні з Флорыды ў нядзелю ўвечары, Трамп выразна даў зразумець, што яго запланаваная тэлефонная размова з Пуціным у аўторак будзе прысвечаная таму, якія землі і актывы Расія захавае ў выпадку спынення агню з Украінай. Пра гэта піша The New York Times, адзначаючы, што, па сутнасці, Трамп будзе весці перамовы пра тое, якую ўзнагароду атрымае Расія за 11 гадоў адкрытай агрэсіі супраць Украіны.
Памочнікі Белага дома выразна далі зразумець, што Расія, безумоўна, захавае Крым, і, імаверна, амаль усю тэрыторыю, якую захапіла. Як адзначае NYT, хоць прадстаўнікі адміністрацыі прэзідэнта ЗША падкрэслівалі, што вычарпальна інфармавалі сваіх украінскіх калег і еўрапейскіх лідараў пра ўзаемадзеянне з Расіяй, у тэлефоннай размове будуць удзельнічаць толькі Трамп і Пуцін, а іх памочнікі будуць слухаць. І незразумела, ці пагодзяцца Украіна і буйныя еўрапейскія дзяржавы з тым, пра што могуць дамовіцца прэзідэнты ЗША і РФ.
«Я думаю, у нас з Расіяй усё добра», — сказаў Трамп журналістам. Закранаючы пытанне, ад чаго Украіне, магчыма, давядзецца адмовіцца, ён сказаў: «Мы будзем гаварыць пра землі», «мы будзем гаварыць пра электрастанцыі», відавочна, маючы на ўвазе Запарожскую атамную электрастанцыю.
NYT піша, што ў сваіх публічных выступах дарадца па нацыянальнай бяспецы Стывен Уолтц і іншыя памочнікі Трампа робяць акцэнт на тым, што самым важным вынікам перамоваў мусіць стаць спыненне забойстваў пасля трох гадоў жорсткай вайны. Але пры гэтым мала гавораць пра ўмовы спынення агню, лічачы, што яны другасныя адносна гэтай маштабнейшай місіі.
Адміністрацыя Трампа ўжо дала зразумець: яна чакае, што Расія будзе кантраляваць прыкладна 20% Украіны, якія яна акупавала. Але памочнікі прэзідэнта Украіны Уладзіміра Зяленскага заявілі ў мінулым месяцы, што яны занепакоеныя тым, што Трамп можа падтрымаць іншыя жаданні Пуціна, магчыма, уключаючы крытычна важны порт Адэса, сцвярджае выданне.
Сярод іншых прыкмет таго, што «Трамп рыхтуецца пайсці на саступкі Пуціну», NYT называе выхад ЗША з міжнароднай групы па расследаваннях злачынстваў Пуціна і яго саюзнікаў, адказных за ўварванне ва Украіну. А таксама скарачэнне працы, якая выконваецца групай па адказнасці за ваенныя злачынствы, створанай у 2022 годзе тагачасным генеральным пракурорам ЗША Мерыкам Б. Гарландам.
NYT праводзіць паралелі з Ялцінскай канферэнцыяй 1945 года, калі Чэрчыль, Сталін і Рузвельт «падзялілі кантынент на Захад, звязаны з Амерыкай, і Усход, які знаходзіцца пад уладай Саветаў, стварыўшы сферы ўплыву, якія сталі палямі бітваў халоднай вайны».
«Буйныя дзяржавы імкнуцца дамовіцца пра новы сусветны парадак у першую чаргу адна з адной, шмат у чым гэтак жа, як гэта рабілі лідары саюзнікаў, калі яны перамалёўвалі карту свету ў Ялце», — цытуе NYT Моніку Дафі Тофт — прафесарку міжнароднага права.
Прафесар Тофт сказала, што пашырэнне тэрыторыі — «гэта тое, чаго хоча Пуцін, і гэта, відавочна, тое, чаго хоча Трамп — проста паглядзіце на Грэнландыю, Панаму і Канаду». Яна працягнула: «Гэта тое, што гэтыя лідары лічаць неабходным зрабіць, каб зноў зрабіць свае краіны вялікімі».
«Вялікі пытальнік — гэта Кітай», — дадала яна. Вынік перамоваў — і асабліва пытанне пра тое, ці будзе ўзнагароджаны за надзвычай затратную вайну, — «можа паказаць на тое, што адбудзецца, калі Сі Цзіньпін вырашыць захапіць Тайвань».
